Никвлад Самсонов Граня верос Туннэ ӝыт Гранялэсь сюлэмзэ сокем вӧсь каризы - дораз бертӥз но, нидаз пырыса, паськыт вылтыро скалзэ маялтӥз, саураз кымессэ лякиз, зар-зар бӧрдӥз: синкылиосын гинэ ӧз тырмы, дугдэм бераз но викышъянъяз пельпумъёсыз кема ӝуткаськизы на. Лулӟылэмезлы быдэ. Алигес кунян ваем скалэз кузё кышнолэсь суралтэмзэ пужалтыса ик куртчонъяз кышномурт шоры паймыса учкылӥз: мар, пе, сокем луиз тыныд. Вӧсь каризы Гранялэсь сюлэмзэ, самой векчи интызэ ик шедьтӥзы. Кин-о сыӵе мурт вань Иллягуртын, самой со кӧй мугоро Олёна сяна? Вирсэртэмез. Сюлэмтэмез. Гуртоос туала арын ог-огенызы магазинысен гинэ огазе люкасько на: толэзьы огпол пенсия басьттэменызы ӵош ог-огенызы адӟиськемзы, кенешемзы со луэ. Мар карод на, улон озьы бергаса кошкиз бере. Пенсия сёткась кышномурт сэргысь ӝӧк сьӧры интыяське, мӧйы радо калык со котыре черодэ султэ. Татысен ик кышномуртъёс лычсузьымоназы ик кин ке сярысь пӧллёзы, чигозы, кинэ ке серекъялозы, ултӥялозы. Вожъяськон мылкыдзэс кыре уз поттэ, но со шӧдӥськытэк уг кыльы. Шонерак верано ке, люккськем кышноос ушъяны мыло-кыдоесь ӧвӧл: одно ик гуртооссылэсь маке но шексэс утчалозы, собере, трос тодӥсь луэмзэс возьматыса, оломар но пӧллёзы. Сыӵе, пе, сямыз кышномуртлэн. Вордскем дырысеныз. Сое, пе, номырин уд бералты, уд быдты. Асьме дырозь озьы вал, асьме бӧрсьы но озьы ик кылёз... Ӧйтӧд, ӧйтӧд, но удмурт кышномурт азьвыл сабырлыгес вал. Озьы кадь потэ. Нош Гранялэн кӧтӝож луонэз кыл пӧллем вылысь ӧз пот, пырак синмаз вераса ик куштӥзы. Калык син азьын. Пенсия ваем сярысь иворез Иллягуртын ог кык-куинь нунал ик вазенгес возьманы кутско, пенсия сёткась кышномуртлэсь Клавалэсь вуэмзэ олокызьы гинэ тодо, магазинысен соку ик черодэ султо: туала арын уд вала, пенсилы но, ява, тырмыт коньдон уг нулло, уд но шӧды, буш кылёд, эшшо арнязэ возьмано луод на... Толон Граня но озьы шуыса ик дыртӥз вал. Калык манер сылэ, кыл шеремзэс пеляз тыре но, уг но кадь, сокем анланы уг тыршы. Сопал урамысь Ольга апай бӧрсьы султӥз но сылэ. Ас малпанъёсыз пӧлын. Гранялэн кузпалыз - гур ӝутӥсь, ӵемысь мукет гуртъёсы ӧтчало. Кибашлы. Табере гур ӝутӥсь калык но ёросын чиньыен лыдъямон сяна ӧвӧл ни. Пал киысь чиньыен. Соин Гранялэн кузпалыз ки вылэ ӝутыса нуллымон адями: легковоен нуо, паськыт пельпумо, быгыль-быгыль мугоро начальникез сямен, доразы асьсэос ваё. Куддыръя воргоронлэн пыд-кукыз сокем либрамын луэ, Граня ачиз кунултыса валтэ капка ул пул ваментӥ. Коньдонэз, ма, ужамысьтыз тырмыт потэ, но... Юонэз вань ук... Тӥни мар уг кельшы Гранялы. Мултэс трос сектало. Таизлэн пыкъяськон уг тырмы. Аракы чаркалэсь... Тӥни со сярысь малпаськыса сылэ туннэ но. Неужто гур пуктӥсез туннэ но Биялась тютьырмыса вуоз меда? Самой соку ик азьпалаз чуртнаськыса Олёна султӥз. Шок-пуль луэм. Мукет дыръя пал кыл но ӧй поттылысал, дыр, Граня, но али мылкыдыз позырак луиз: ма, кызьы-озьы суам ымнырын мукет муртлэн азьпалаз султод, пе. Юатэк но, вератэк но. - Дугды ай, Олён, тон татын ӧд сылы ук? - Кызьы? Нош тон мар понна? Урамтӥ магазинэ васькемдэ адӟи, малпай, мон понна но сылод, дыр, шуыса. Калыклы ивортӥд, дыр, ук? Мон но вуо шуыса? Пензи ӵош басьяськом ук... Ӧз вера-а, мар-а, Ольгапай, мон татчы султӥсько шуыса? Ӧз? Осто, Грани, ымныртэм ик адями тон... Пичи дырысен весь верасько, монэ эн вунэты шуыса, нош тон... - Ма... - Мар-о "ма"? Уд тодӥськы-а, шай-а? Мынам сиисьёс, уксё понна бӧрдӥсьёс ӝӧк котырак ик. Тынад мар? Тыныд пензи дуре сокем дыртытэк но ярасал, ачид да гур ӝутӥсед, писэед сяна, нянь куртчисед ӧвӧл.. - Яралоз ни милемлы... - Яралоз. Кызьы-о уз яра. Муры скал но озьы ик, пе, шуэ. Хы-хы-хы... Олёналэн гырдалтэмез пумысь нокин нокыӵе ӧз кариськы, магазинын шыпак луиз: ӵапак гудыръяса зорон азьын кадь. Вань люкаськемъёс лычсузьыса ик возьмало кык кышномуртъёс куспын керетон потэмез. Ярато ке ярато Иллягурт кышноос мукет адямиослэсь ваче гадь шуккиськылэмзэс! Пырс! потӥз но кошкиз магазинысь Граня. Урам кузя вамышъякуз викышъямзэ ӧз возьматы, пушказ тымиськыса улэм бӧрдӥсь кӧтӝожзэ скалэзлы саур вылаз кисьтӥз... Тӥни соку ик тодаз ваиз кемалась ортчемъёссэ. Тани соос Олёнаен ӵош дас классын дышетско. Средней школаед соку райцентрын гинэ вал ай: бадӟым ожмаськон али гинэ быремын. Татын дышетскемед понна коньдон тыроно. Фронтысь бертэм агаез Граня понна коньдон тыре. Бухгалтерын ужа. Мытесын. Кыкез но кукъёсыз вандылэмын. Семья заводьыса ӧз вутты вал. Кудӟем дыръяз озьы ик бӧрдэ: мыным табере кин бызёз на, одӥг тон гинэ, Граняе, дыдые, шумпотонэ. Дышетскы, визьмо лу, калыклэсь эн возьдаськы. Сирота поннад но йырдэ мукет адямиос азьын мыкыртыса астэ ултӥ эн кар... Лёгор агаез тӥни озьы дышетылӥз Граняез. Нош улыны кӧй мугоро ӟуч кышномурт дорын улӥзы. Патерын. Пичияк висъетын. Граняен Олёна отысь сюбег койка вылын артэ ик кӧлаллязы. Гранялэн мугор шур дурысь векчи бадьпу ньӧр зӧкта сяна ӧвӧл бере, койка дуре лякиськыса кадь изе вал. Олёна вӧл-вӧл кариськыса улыны дышемын: кӧлыкуз но быг-быг пыдъёссэ койка вамен вӧлъя но кӧтыз тырымон соргетэ. Граня вӧзаз ик ӧвӧл кадь потэ, лэся. Сиськыны но Олёна мыло-кыдо. Иллягуртын солэн бубиз председатель бере, сиён-юон ласянь Олёна ёрмонэз ӧз тодылы. Райцентре олокыӵе но ӧтчамъёсы-совещаниосы Иллягуртысь колхоз тӧро арнялы-толэзьлы олокӧня пол вуылэ. Кошовкаяз* одно ик макес сӥль я мешокын кеньыр, шунытгес куазен картошка я кубиста вуттоз. Трос уз вераськы, умой улэ шуоз но капказьысь кельыт ужпилэсь сермет калзэ пертчылоз - сылон интыяз далай гинэ ӵабъяськыса сылӥсь, дор палъёсаз табере ыбиськыса лобӟыны дась валлэн кошовкаяз олокызьы гинэ тэтчыса ганяк лэзиське. Предлэсь ворттылон валзэ устолэсь но усто сюдо. Иллягуртысь пыдэс мырдэм кыскась валъёс чотын шуэмзы шонер но, дыр... Школаысь бертон азязы нылъёслы кузё кышно Глафира бырем гуртаз шыд пӧзьтэ вал. Кыкназылы но нимаз. Кык гӧршокъёсын. Олёналэн бубиз озьы косӥз, пе. Олёналы вӧл- вӧл, паськыт кӧтурдэсо гӧршокын, нош Гранялы - ачиз кадь ик шымырскем мугоро пичи чугунын. Сиськон дырзы Граня понна самой курадӟытӥсез вал. Ма, шонерак верано ке, Олёналэн кӧйын-вӧйын пальккаськись шыдэз шоры учкыса, сюмамтэ муртлэн но сиемез потыны кутскоз: сокем зумыт пӧрме вал гурын пырс-пырс луэм шыдэз. Кубистаен, парсь сӥлен. Кӧня ке ӟузьылэмез бере Олёна сӥлез борды кутске, котькуд лызэ, оло, чупаны ик дась луэ. Тае адӟыса, вожъяськыса, Гранялэн кӧтӝожен тырмем мылкыдызъя синкылиосыз бездыт, лызпыръем шыдэныз тусьтыяз ӧжыт гинэ уг усьыло. Шыд нерге шуоно, дыр. Глафира патерантъёсызлы тазьы нимаз пӧзьтылыны чутрак пумит кариськиз вал: сомында-сомында, пе, выронэз, утялсконэз. Олёналэн бубиз одӥгаз лыктэмаз кузё кышнолы корказяз быдэс мешок кӧжы вайыса кельтӥз. Глафира кума, пе, таиз мынам кышнолэн саламез. Ӟуч кышно кобызэ ӧз усьялля ни. Нош Гранялэн отӥ-татӥ уясь кеньырен, кык-куинь картошка юдэсэн шыдэз пумысен ымзэ кырыжтыса шуылоз вал: мон, пе, Глафирунька, пуныме но тынад шыдэдлэсь ческытгес сиёнэн сюдӥсько. Неужто, пе, агаед уг валатскы со пумысен? Кызьы уз валатскы Гранялэн Лёгор агаез, одно валатске. Юрттыны уг быгаты. Ачиз но е бычыезлы выль пась лэсьтӥз ни бере: ӟоскыт жаловання тыро, пе. Ачиз озьы шуэ. Соиз но шонер, дыр, но Лёгор агаезлэн мукетыз но вань: жалованняысьтыз тросэз чыртызэ гочатӥсяз кошке. Со пиртэшсэ нокызьы вормыны уг быгатӥськы, пе, куректыса юисько шуэ. Олёналэсь парсь сӥль сиемзэ адӟыкуз, Гранялэн гадь вылаз оломаиз оломар луылӥз, куддыр ас малпанъёсаз Олёналы йыбырттылӥз: "Сёт ук, Олёнӥ, самой со куажымо лыдэ мыным йырйыны. Эшъёс ук асьмеос..." Гранялэсь таӵе мылкыдзэ Олёна ӧз шӧдылы, пичи ке но сӥль юдэссэ мычыны тодаз но ӧз лытылы. Со понна перепечъёсын утялтэ вал: тригонометриен Олёна мыркомем тул но тӥни - номырзэ уг йӧндыры. Граняез бергатытэ. Гранялы мар-о, ӵӧжлы вуын пыласькем кадь сяна уг йӧты. Котькуд тригонометри задача понна Олёна Гранялы перепеч мычылӥз: мумиз олокыӵезэ но пыжыса келялоз вал - сяртчыен но, картошкаен но, губиен но, кӧжыен но, кукеен- кубистаен но, сюлэн но, виро ӝукен но... Со ортчемъёсыз пӧлысь мукетыз но таӵе ик син азьын на. Ожмаськон-жугиськон война бере аръёсы сиён-юон уг тырмы бере, гурт калык ассэ сюдӥсь но утись нюлэскы кыстӥськылӥз. Мыло-кыдо мурт гужем куазен отысь одно маке шедьтоз. Граняен Олёна эмезяло. Пӧсь. Дурыстэм пӧсь. Вылаз ик, лӥялъёс котыре ӝужам эмезьпудъёс оломарлы сокем пушнерен эшъясько: киосыз но, пыд котыръёсыз но пульсатъяло. Олёна нюло саюлысь лӥял вылын пуке, Граняез аслаз сарбаяз бичаськытэ. Капчи-а таӵе куазен бичаськонэд? Нош кытчы кариськод? Олёна бичаськемез понна кӧня ке аръян, кык шорет нянь сёто шуиз. Чабей нянь. Сыӵе нянез Граня веръямзэ ик вунэтӥз ни. Нош Олёналэн азьысьтыз уг бырылы. Бубиз пред бере... Мылысь-кыдысь бичаськиз Граня. Ымыз одӥг эмезь донгыны но аслыз маза ӧз сёт. Озьы ке но, куакъёс сьӧрысь ӵем гинэ Олёналэн вазьылэмез кылӥськылэ: "Граня! Тырмытӥд-а ни? Мар-о сокема?" та куара ик Граняез эшшо но дыртытэ. Пушнераськон шоры учкыны ик маза ӧвӧл. Нуназе котырын гинэ Олёналэсь сарбазэ тырмытӥз. Шумпотыса ик сётскиз вал нюло куакъёс пала. Дыртонъяз, силё борды канжаськыса, бичаськемзэ ӧжыт гинэ ӧз питыраты. Гранялэсь мылазяз ошем сарбаез Олёна кыскыса ик басьтӥз. Мын, пе, табере аслыд бича, мон саюлын ныралско. Вай, пе, артчёттэ* ымныр вылам возъяло. Чибиньёслэсь, пе... Собере Гранялы ӝыны шорет нянь сётӥз на. Котмем мае ке. Лянэсысьтыз аръянэз кисьтаськиз, луоз. Вождэ, пе, эн потты, Грани, сюэ куасьмиз, ваньзэ аръянме юыса быдтӥ... Со нянь шоретэз гуньдылыса-гуньдылыса сииз Граня. Викышъяса-викышъяса. Олокыӵе но мылкыдъёслы луыса, лэся. Сюлэм пушкысьтыз. Шуо ук, сирота муртлэн сюлэм вир тылын гыбдась, пе, луэ. Верамзы шонер. Сарбазэ тырмытэм бераз Граня Олёнаез сайкатӥз, артчётсэ ымныр вылысьтыз сюлтрак кыскиз но ас кусказ ик керттылӥз... * * * Ваньзэ тае тодаз вайыса, Гранялэн мылкыдыз пызьырак луиз: малы тазьы скалэз вӧзын бӧрдыса сылоно? Чик ӧвӧлтэм Олёналэсь суам ымнырзэ вань улон даураз чиданы кулэ-а, мар-а? Маин ке янгыш шат Граня? Со-а калык рад уг улы? Солэн-а коркаез, юрт котырыз калык рад ӧвӧл? Олёна сямен чабей нянь сиыса улысал, Лёгор агаез аракы вылэ чӧлскыса улонысь дырызлэсь вазь ӧй кошкысал ке, со-а азьланяз дышетскыны ӧй быгатысал? Быгатысал! Нош нылпиез? Солэн-а "ӝӧк котыр" нылпиез ӧй луысал, Посьтолысь делянкаын секыт кислэсъёсыз ӝутканъяз едӥнь котырысьтыз оломарзэ ӧй ке чигтысал? Иллягуртысь председатель Олёна интые келяз ук Граняез нюлэс дасянэ. Луысал, одно луысал Гранялэн но нылпиосыз, со проклят война- ожмаськон, солэн бервылыз ке ӧй луысал... Вералоз, одно пырак синмаз вералоз Граня вирсэртэм Олёналы аръёсын тымиськыса улэм мылкыдзэ. Кисьтыса ик лэзёз! ... Таӵе дӥсьтӥсь луэмез аслыз ик мусо потӥз. Гидысьтыз ӟеч мылкыдын потӥз. Учке но - гур ӝутӥсез пыре. Ассэ ачиз капка ул пул вамен чырткемак вамыштытӥз. Сазь, лэся. "Умой-а улӥды?" - шуиз, корка пыриз. Тае адӟыса, Гранялэн мылкыд шуназ, кузпалыз сьӧры ик пырон вылысь корказь ӧсэз усьтыны шӧтам вал - шуак дугдӥз. Нош Олёна? Тырмоз-а Гранялэн соин ӝот-ӝот вераськон вылысь бугырскем мылкыдыз, быгатоз-а али гинэ аслыз кыл сётэмез Олёна вылэ ӧръяськыны? Пождаськем тулыс тудву кадь поръяса, позыръяськыса? Оло эшшо чидано, оло ческыт ымез кӧш кароно ӧвӧл, оло ваньмыз азьло сямен ик мед кылёз ни? Ӧйтӧд, ӧйтӧд... Гур ӝутӥсен кенешоно шат? Мар меда шуоз? Али ик... Кышномурт чырткемак, егит арлыдъёсаз кадь, кокразь тубатлэн лёгетъёсыз вылтӥ вамыштӥз. 1995, оштолэзь. * Кошовка - бурдо, кык кузя пуксьымон дӧдьы. * Артчёт - (диал. ) айшет.