ООН-лӧн шуӧм серти вужвойтырӧс доръян вояс
1995 – 2005
БУРТАС
Морт инӧдъяс йылысь быдӧнлы инана шыӧдчӧм да коми вужвойтыр
Комиӧн сёрнитысьлы уна рӧма небӧг
Став серпасыс А. Мошевлӧн
Сыктывкар
2001 во
ББК 67.412.1
Б 91
Небӧг лэдзан уджӧн юрнуӧдіс Н. Митюшева.
1948 воын ООН вынсьӧдіс Морт инӧдъяс йылысь быдӧнлы инана шыӧдчӧм. Сэтчӧ чӧжӧма став мувывса мортвужлысь медбур оланногсӧ. Челядьлы гӧгӧрвоана роч шыӧдчӧмсӧ комиӧдісны Н. Красильникова да И. Митюшев, налы отсаліс Л. Анисенкова. Важ коми Олӧмысь да польклорысь бӧрйӧм сюрӧсъяссӧ мӧвпыштісны – лӧсьӧдісны И. Митюшев да А. Мошев. Небӧгсӧ йӧзӧдӧма сы могысь, медым челядьлы да верстьӧлы петкӧдлыны мортлысь да вужвойтырлысь инӧдъяссӧ коми видзӧдласӧн. Небӧгас эм велӧдысьлы пасйӧдъяс да комиа-роча кывӧктӧд.
67.412.1
Б 91 Буртас. Морт инӧдъяс йылысь быдӧнлы инана шыӧдчӧм да коми вужвойтыр. – Киров –
Сыктывкар, 2001. – 48 лб.
1207000000
Небӧгсӧ йӧзӧдӧм вылӧ сьӧмсӧ сетіс Хельсинки университетын велӧдчысь котыр.
© Красильникова Н. А., вуджӧдӧм, 2001.
© Митюшев И. В., вуджӧдӧм, бӧрйӧм-лӧсьӧдӧм, 2001.
© Мошев А. В., серпасъяс, 2001.
ВОДЗКЫВ
Морт инӧдъяс эмӧсь быд сёрниа войтырлӧн. Инӧдъясыс вежсисны-вынсялісны, сӧвмисны уна сюрс во чӧж, но мыйсюрӧ воис и зэв важся оласногсянь. Коми культураын морт инӧдъяслӧн да уджмогъяслӧн (обязанносьтъяслӧн) тшӧтш вӧлі аслас вежӧртас. Коми йӧзлӧн олӧмыс уна сюрс во вӧлі йитчӧма пармакӧд, та вӧсна коми оласноглы подулӧн вӧлі мортӧс кытшалысь му-видз да парма-яг. Ас йӧзкотырлы комияс важысянь кужлӧмаӧсь лӧсьӧдны колана бур оласног. Пармаын олысь войтырлы эз ковлы томан. Гортса эмбур нажӧвитны вӧлі вывті сьӧкыд, сійӧ ставнас вӧлі урчитӧма лыда йӧзлы да гусясьӧмыс вермис пикӧ вайӧдны войтырсӧ.
Морт инӧдъяс быдӧнлы сетӧны позянлун овны ас коддьӧмъяс котырын мездаа, повтӧг да бура.
Немеч пашизмлӧн сӧвет коммунизмкӧд пурсьӧмыс 1939 воын пестіс мирса мӧд тыш. Кыкнан ыджыдаласногыс ӧтмоза нырисны мортлысь подув инӧдъяссӧ да ёна уськӧдісны мортлысь тӧдчанлунсӧ. Уна сикас шог вайис быд кывъя войтырлы став мирса мӧд тышыс. Тайӧ и ышӧдіс канмуясӧс ӧтувтчыны, медым водзӧ вылӧ видзны Муюгыдсӧ выль тышъясысь, дорйыны ури (мир), повтӧм олӧм, ичӧт да ыджыд лыда войтыръяслысь инӧда ӧткодьлун. Та понда 1945 воын артмис Ӧтувтчӧм Канмуяслӧн Котыр (ООН). Сійӧ 1948 воын вынсьӧдіс Морт инӧдъяс йылысь быдӧнлы инана шыӧдчӧм.
Став мувывса войтырлӧн нэмъяс чӧж сӧвмӧм лӧнь да бур олӧмӧн овны кӧсйӧмыс лои вынсьӧдӧма тайӧ Шыӧдчӧмас, да быд канмулы Шыӧдчӧмыс лои морт нога олӧмлань туй индалысьӧн.
Европаын пашизмлы вӧлі пуктӧма пом. 1948 восянь морт инӧдъяс ӧдйӧ овмӧдчисны сэтшӧм канмуясын, кӧні войтыръясыс уна вир кисьтӧмӧн либӧ сытӧг важӧн нин шедӧдісны асшӧрлун – ассьыныс канму подув, а сэсся збоя кутісны бурмӧдны йӧзкотыр.
1991 воын на Сӧвет Союзын (коммунизм киссьытӧдз) морт инӧдъяс йылысь панӧм сёрниысь йӧзӧс пуксьӧдлісны дзескыдінӧ либӧ вилісны. Перестройка кад личӧдыштіс кӧртвомалӧм морт инӧдъяслысь гезсӧ да сетіс позянлун котыртчыны водзмӧстчысь йӧзлы, медым дорйыны ыджыдалысьяс (власьт) нартысь торъя мортӧс либӧ йӧз котырӧс: мыжтӧг мыждӧмаясӧс, салдатъясӧс, ай-мамтӧм челядьӧс, вермытӧм йӧзӧс да мукӧдӧс. Но ӧнӧдз на Рочмуын сёысь унджык быд сикас кывъя войтыр миян моз жӧ колины инӧдтӧм кесйӧгъясӧн (рабъясӧн), да таысь мездысьӧмыс лоӧ ставнымлы медыджыд могӧн.
Тайӧ небӧгнас ми кӧсъям матысмӧдны морт инӧдъяссӧ коми йӧз дорӧдз, коми челядьӧдз.
Морт инӧдъяс йылысь быдӧнлы инана шыӧдчӧм потшӧ власьтлысь морт олӧмын ыджыдалӧмсӧ да канмуса Подувпуктас (Конституция) отсӧгӧн сетӧ позянлун сӧвмыны быдӧнлы. Но кор войтырӧс сюйӧны мӧд войтырлӧн нарт улӧ либӧ ыджыдалӧм улӧ, тайӧ лоӧ мортлысь подув инӧдъяссӧ торкалӧмӧн, да увтыртана войтырыс коркӧ век жӧ кыпӧдас мездысяна тыш. Сідзкӧ, империя лоӧ вир кисьтана тышъяслы позйӧн, да сійӧс быть колӧ вальдӧдны. А вермӧм войтырлӧн мездлань синӧмыс лоӧ морт инӧдъяс дорйӧмын медводдза тшупӧдӧн.
Тайӧ тӧждыс Ӧтувтчӧм Канмуяслы тшӧктіс пыдди пуктыны став сикас кывъя войтырлысь инӧда ӧткодьлун (равноправие) да 1966-ӧд воын сетіс позянлун вынсьӧдны Канмуяскостса кык сёрнитчӧм (пакт). Сэтысь лыддям:
1. Быд войтырлӧн (народлӧн) эм инӧд ас кӧсйӧмӧн олӧм лӧсьӧдӧм вылӧ. Тайӧ инӧдыс сетӧ налы позянлун мездаа индыны ассьыныс оланног (политическӧй статус) да сӧвмӧдны ас овмӧс да культура.
2. Быд войтыр ыджыдалӧ ас му озырлун вылас, вӧдитчӧ сыӧн ас кӧсйӧм серти олӧмсӧ сӧвмӧдӧм могысь. Тайӧ инӧдсӧ оз позь мырддьыны весиг ӧти вужвойтырлысь.
3. Став асшӧр канмулы (государстволы) да асъюравтӧм либӧ дӧзьӧрувса муясӧн (колонияясӧн) быд юрнуӧдысьлы колӧ пыдди пуктыны да отсавны войтырлы збыльмӧдны асъюралӧм вылӧ инӧдсӧ.
Тадзи артмис Морт инӧдъяс йылысь Ыджыд Кабала (Хартия), кытчӧ пырӧ нёль гижӧд.
Ыджыд Кабала (Хартия):
1. Морт инӧдъяс йылысь быдӧнлы инана шыӧдчӧм (1948 во),
2. Овмӧс, йӧзкотыр да культура инӧдъяс йылысь канмуяскостса сёрнитчӧм (международнӧй пакт) (1966 во),
3. Кансалӧн (гражданалӧн) инӧдъяс да кансяма (политическӧй) инӧдъяс йылысь канмуяскостса сёрнитчӧм (1966 во),
4. Кансалӧн инӧдъяс да кансяма инӧдъяс йылысь канмуяскостса сёрнитчӧм дорӧ содтӧд сёрнигижӧд (протокол) (1966 во).
Войтырыс (народыс) – ӧти сёрниа МОРТЪЯС, та понда гижӧдъясыс ӧткодя пыдди пуктӧны вужвойтырлысь (народлысь) да мортлысь инӧдъяс, ӧткодя пыдди пуктӧны асшӧрлуна либӧ мырддьӧм муясын олысь войтыръясӧс.
Коми видзӧдласӧн морт инӧдъяс велӧдӧм
Збыльвывса демократияа муясын морт инӧдъясӧ велӧдӧмыс веськӧдӧма тайӧ муыслысь олан тэчасногсӧ водзӧ бурмӧдӧм могысь. Сӧвет Союзлӧн вальдӧм-киссьӧмыс кодъяслыкӧ вайис мездлун. Найӧ мынісны роч ыджыдалӧмысь да босьтчисны сӧвмӧдны ас канмуяс. А Россия улын кольӧм войтыръяслы колис-вичмис рочьяслӧн нарт (колониализм) да став мукӧд кывъя войтыр вылын ыджыдавны кӧсйӧм (шовинизм). Сыысь мездысьны позьӧ россияса быд сикас кывъя войтырӧс морт инӧдъясӧ велӧдӧмӧн, найӧс пыдісянь гӧгӧрвоӧдӧмӧн да тайӧ инӧдъяссӧ олӧмӧ пӧртӧмӧн.
Морт инӧдъясӧн тӧдмасьӧм
Мортлысь да вужвойтырлысь инӧдъяссӧ велӧдӧм важӧн нин колӧ вӧлі пыртны велӧдчанінъясӧ. Ӧтувтчӧм Канмуясӧн вынсьӧдӧм Ыджыд Кабала да мукӧд кывкӧртӧдыс тадзи и тшӧктӧны. Россия да Коми му Подувпуктасъясӧ пыртӧма жӧ найӧс.
Россия улын олӧны сё пӧлӧс кывъя йӧз, а вылӧ лэптӧма сӧмын “рочӧс” да сылысь кывсӧ. Тадзи лои кедзовтӧма став мукӧд войтырсӧ: некодлы на пиысь абу на сетӧма ас му вылын ас кӧсйӧм серти олӧм лӧсьӧдӧм вылӧ инӧд – асшӧрлун вылӧ инӧд.
Тайӧ лоӧ вужвойтыръяслысь медводдза да медыджыд инӧдсӧ торкалӧм: налысь мырддьӧма ас му вылын ыджыдалӧм (власьт), ас кансям (политика) нуӧдӧм, чужан кыв, эскӧм да культура сӧвмӧдӧм, ас озырлунӧн ас кӧсйӧм серти тыр-бур олӧм лӧсьӧдӧм. Вужвойтырӧс быдлаті кизьӧртӧма мӧд кывъя локтӧм йӧзӧн.
Ми олам войтыръясӧс увтыртан канмуын (государствоын), кӧні мортлӧн да весиг дзонь войтырлӧн олӧмыс нинӧм оз сулав!
Сідзкӧ, Россияын вужвойтыръяслысь инӧдъяссӧ дорйӧмыс олӧмын лоӧ медся коланаӧн.
Талун нин биӧн дӧлалӧ-ӧзйӧ мусира Колва, гудрасьӧны пармаын зарни да газ-мусир корсьысь вына машинаяс, кӧрт туй улӧ водӧ удорса парма; лёк пыкӧсъясысь (ракысь) быд во кулӧны уна сё морт… Тадзитӧ вӧд и ачыс комиыс вӧр-ванас, му-видзнас да енэжнас вермас дзикӧдз бырны Муюгыдсьыс…
Сідзкӧ, морт инӧдъяс йылысь сёрниыс Комиас абу на и вӧвлӧма.
Морт инӧдъяссӧ збыльмӧдӧмыс мукӧд канмуын кыссис некымын сё во, кӧнкӧ и тышъясӧн. Ӧнія кадӧ миян эм позянлун збыльмӧдны найӧс вир кисьттӧг. Колӧ сӧмын гӧгӧрвоны, мый морт инӧдъяссӧ сетӧма дзик быд мортлы. Инӧдъясыс лоӧны мырддьыны позьтӧмторйӧн да натӧг мортыс оз вермы овны – оз ло мортӧн.
Сідзкӧ, быд мортлы колӧ зіля сюйсьыны ассьыс инӧдъяссӧ дорйӧмӧ, оз ков виччысьны, мый кутшӧмкӧ власьт сетас найӧс дасьӧн. Власьтлы кивыв, кор войтырыс оз тӧд ассьыс инӧдъяссӧ, а сідзкӧ оз кут тшӧктыны збыльмӧдны найӧс. Сэки власьтыс асалӧ войтырлысь инӧдъяссӧ да пӧртӧ войтырсӧ кесйӧгъясӧ, кывтӧм пемӧсъясӧ. Он кӧ тӧд ассьыд инӧдъястӧ, кыдзи кужан найӧс корны?.. Кытчӧдз войтырыс мырдӧн оз тшӧкты – сэтчӧдз власьтыс инӧдъяссӧ и дзебӧ.
Сідзкӧ, медым коми вужвойтырлы кужны да вермыны дорйысьны ас му вылас власьтысь да мукӧд кывъя йӧзлӧн увтыртӧмысь да дзескӧдӧмысь, колӧ зэв бура тӧдны ассьыс инӧдъяссӧ.
Тайӧ небӧгнас позьӧ вӧдитчыны геограпия, история, обшествоведение, коми кыв, литература да мукӧдтор велӧдігӧн.
Морт инӧдъяс йылысь сёрнитігӧн велӧдысьлы колӧ петкӧдлыны, кыдзи найӧ йитчӧмаӧсь коми олӧмыскӧд. Небӧгас серпасалӧм-гижӧмсӧ позьӧ петкӧдлыны-висьтавны ас культура, чужан кыв, коми автономия лунъяс нуӧдігӧн да нималана коми йӧзлы сиӧм чукӧртчӧмъяс дырйи.
Небӧгсӧ серпасалӧма зэв аслысногӧн, та вӧсна тіянлы аслыныд ковмас гӧгӧрвоны, мый йылысь серпасъясыс. Мортлысь да вужвойтырлысь кутшӧм инӧдъяс наын торкалӧма? Мый колӧ вӧчны найӧс дорйӧм могысь? Коді торкалысьыс? Кодлы лёк? А гашкӧ тіян олӧмын вӧлі мыйкӧ татшӧм сямаыс? Кыдзи бырӧдны лёксӧ? Челядьлысь юалӧмъяссӧ оз позь кольны воча кывтӧг, да мед эськӧ найӧ асьнысджык и сёрнитӧны.
Морт инӧдъясыс топыда йитчӧмаӧсь быд лунъя олӧмкӧд. Велӧдысьлы медводз колӧ бура гӧгӧрвоны, мый сетӧны морт инӧдъясыс, да колӧ аслыс овны на серти да ышӧдны та вылӧ велӧдчысьясӧс.
Ас войтырӧс дорйыны кужӧмыс енэжсянь оз усь. Но медколанаторйыс – кианыд нин. Морт инӧдъяс йылысь быдӧнлы инана шыӧдчӧмӧ чукӧртӧма быд кывъя войтырлысь сюрс воясӧн чӧжӧм мывкыдлунсӧ. Колӧ сӧмын юӧртны-гӧгӧрвоӧдны сійӧс Коми республикаын олысь йӧз пӧвстын. Буретш татшӧм удж вӧчӧ “Доръям асьнымӧс” коми ютыр (партия). Кӧсъянныд кӧ, верманныд тӧдмасьны ютырсакӧд да ӧтвылысь уджавны ас войтырӧс мездӧм - кыпӧдӧм могысь. Со найӧ:
Альберт Логинов олӧ Пызьдін сиктын, Удорса депутат, уджалӧ вӧр-ва да сынӧд видзӧм могысь, тел.: (8235) 35-4-11.
Алексей Канев олӧ Изьваса Ласта грездын, велӧдысь, коми оласног да мӧвпаланног туялысь, “Буртас” котыр лӧсьӧдысь
да юрнуӧдысь, Ен кыв паськӧдысь.
Вера Нечаева олӧ Мылдін сиктын, рочӧн петан газетын “Лыддьысьыштам комиӧн” лист бок дасьтысь, Печора йывса вужвойтырӧс доръян уджӧн юрнуӧдысь, налысь важ да ӧнія олӧм бура тӧдысь, тел.: (8238) 91-7-94.
Вениамин Надуткин олӧ Сыктывкарын, “Коми став” ӧтувӧн юрнуӧдысь, РФ-са да Коми республикаса законъяс бура вежӧртысь да ёрдын дорйысьӧм-мыжалӧм тӧдысь, тел.: (8212) 44-39-85.
Надежда Красильникова олӧ Кӧрткерӧс районса Визябӧж сиктын: сьылысь, вужвойтырлысь инӧдъяссӧ гӧгӧрвоӧдысь, коми кыв, сьыланкыв, важ олӧм да ӧнія власьтӧн кансям (политика) нуӧдӧм йылысь сёрнитысь.
Надежда Митюшева олӧ Сыктывкарын, “Доръям асьнымӧс” коми ютырӧн юрнуӧдысь, “Доръям асьнымӧс” юӧрпас (газет) дасьтысь, тел.: (8212) 45-14-08.
Мыйла колӧ велӧдны морт инӧдъяс.
1. Мортӧс да вужвойтырӧс доръян кабалаяс отсалӧны комияслы эрдӧдны ӧнія гудыр олӧмыслысь вужъяссӧ да югдӧдӧны колана туйвизьсӧ.
2. Гӧгӧрвоӧдӧны морт инӧдъяслысь коланлунсӧ да тӧдчанлунсӧ.
3. Морт инӧдъясӧн тӧдмасьӧм индӧ коми йӧзлы челядьӧс выль нога велӧдан туйвизь да отсалӧ лӧсьӧдны збыльвывса коми школа.
4. Морт инӧдъясӧ ас кывйӧн велӧдӧмыс отсалӧ тыр-бура гӧгӧрвоны найӧс.
5. Вужвойтырлы сетӧм инӧдъясӧн тӧдмасьӧмыс отсалас быд коми туялысьлы (учёнӧйлы) мездысьны полӧмысь, вуж выйӧн вежас видзӧдлассӧ, ышӧдас сійӧс тӧдмавны коми войтыр йылысь збыльсӧ да восьтас позянлун висьтавны та йылысь ас войтырлы.
6. Морт инӧдъясӧн тӧдмасьӧмыс велӧдас коми челдьӧс дорйыны да пыдди пуктыны асьнысӧ. Тайӧ сетас налы позянлун мувывса мукӧд йӧз пӧвстын комилысь лов-этшсӧ нимӧдӧм-лэптӧм вылӧ.
7. Ті тӧдмаланныд, кыдзи став му пасьта быд сикас кывъя вужвойтыр да этша лыда йӧз збыльмӧдӧны асъюралӧм вылӧ инӧдъяснысӧ.
8. Ышӧдас вужвойтырӧс збыльмӧдны мортлысь инӧдъяссӧ.
Морт инӧдъяс йылысь быдӧнлы инана
шыӧдчӧм
СЕРПАСЪЯС ЙЫЛЫСЬ
30 пасйӧд. Ыджыд ён пу петкӧдлӧ Шыӧдчӧмлысь ӧтторъялунсӧ: чегны-торйӧдны ни тшӧтшӧдны-лӧсьӧдны сійӧс оз позь. Сійӧ вына ӧтторъялуннас (9 лист бок)
1 пасйӧд. Яран, коми да йӧгра ӧтлаын кыйӧны чери. Став мортвуж сикаса (расаа) йӧзлы колӧ овны мӧда-мӧдныскӧд лӧсялӧмӧн (11 лб.)
2 пасйӧд. Куим ён морт – коми Пера, йӧгра Асыка да Мурӧмса Илля лоӧны асланыс йӧзыслӧн авъя пиянӧн да дорйысьясӧн. Найӧ лӧня пукалӧны ӧтилаын да нуӧдӧны сэкся кадлы лӧсялана войтыркостса сёрнитчӧмъяс (12 лб.)
3 пасйӧд. Помтӧм-дортӧм пармаын зумыда сулалӧ том зон. Зонка чайтӧ, мый пармаын сійӧс некод оз вӧрзьӧд ни оз дӧзмӧд и сійӧ вермас лӧня овны да лоны мездаӧн. Коми йӧзлы ас му вылын колӧ лоны мезда да асшӧр войтырӧн (13 лб.)
4 пасйӧд. Коми морт жугӧдӧ Строганов граплысь чепъяс (14 лб.)
5 пасйӧд. Руч гусялӧ петукӧс (15 лб.)
6 пасйӧд. Кӧр видзысь коми морт пукалӧ Вой саридз дорын. Мед кӧть кӧні мортыс олӧ, сійӧ оз вошты ассьыс инӧдъяссӧ (16 лб.)
7 пасйӧд. Суддяыс – ош, а отсасьысьыс – сюзь (17 лб.)
8 пасйӧд. Коми купечьяс корӧны Кӧрт Айкалысь сыӧн мырддьӧм эмбурсӧ (18 лб.)
9 пасйӧд. Ягморт гусялӧ Райдаӧс ( 19 лб.)
10 пасйӧд. Уджач мой кӧсйӧ дзоньталыштны чомсӧ. Вӧр видзысь ӧлӧдӧ сійӧс (21 лб.)
11 пасйӧд. Вӧралысь аддзис гуын узьысь ошкӧс, да ошкыс лои жаль… (22 лб.)
12 пасйӧд. Санъяс куштӧны вӧралысьлысь тшамъясӧ (23 лб.)
13 пасйӧд. Йиркап лэбӧ Из сайӧ. Коми морт вермӧ овны, кӧні кӧсйӧ (25 лб.)
14 пасйӧд. Кералӧмаӧсь комияслысь пу енъяс. Пам пышйӧ роч нартитӧмысь да кедзовтӧмысь (26 лб.)
15 пасйӧд. Роч баяр юӧртӧ коми ӧксылы Коммуӧс Рочыскӧд ӧтлаӧдӧм йылысь. Ӧксы висьталӧ: “Тайӧ муыс–важъя Комму – “Ыджыд Перым” (27 лб.)
16 пасйӧд. Верӧспу водзвыв сёрнитчӧмӧн пышйӧдӧ мусуксӧ (28 лб.)
17 пасйӧд. Коми гозъя мунӧны вӧрӧ. Керка ӧдзӧссӧ налӧн сӧмын тасалӧма. Гозъя тӧдӧны: налысь эмбурсӧ некод оз вӧрзьӧд (29 лб.)
18 пасйӧд. Пам йӧктӧ, поп мыйкӧ висьталӧ (31 лб.)
19 пасйӧд. Жугӧдӧм-пузувтӧм вӧрын пукалӧ рака да кравзӧ лёк олӧм йылысь (32 лб.)
20 пасйӧд. Куим коми морт мӧдӧдчӧны разі-пели. Быдӧнлӧн на пиысь эм ас йӧз котыр (33 лб.)
21 пасйӧд. Коми йӧз важысянь пыдди пуктылісны йӧраӧс. Вӧрса олысьяс сійӧс и бӧрйисны Юралысьӧн (35 лб.)
22 пасйӧд. Мудзӧм вӧралысьяс нортӧн кыскӧны кыйдӧснысӧ. Вӧр керкаын налы эм нянь-сов да пес-сюмӧд (36 лб.)
23 пасйӧд. Тыла вӧчӧм. Важ комияслы няньыс шедліс сьӧкыда да вӧлі зэв донаторйӧн (37 лб.)
24 пасйӧд. Жар пывсяныд комилы майбыр (38 лб.)
25 пасйӧд. Куимыдлы куим пӧв уна и колӧ тӧждыс да муслуныс (39 лб.)
26 пасйӧд. Коми бать велӧдӧ писӧ тӧдны рӧдвуж пасъяс (40 лб.)
27 пасйӧд. Сяма кӧ тшупсьысьыс – мича и ӧклупеньыс (41 лб.)
28 пасйӧд. Шуда ныв-зон ӧддзӧдӧны ыджыд гытсан. Нывъяс пукалӧны, зонъяс песӧны вынсӧ (42 лб.)
29 пасйӧд. Чери кыйысь оз эшты вуджӧдны йӧзӧс (43 лб.)
Асшӧрлун судзӧдӧм
Коми сёрни пырӧ пин-йӧгра кыв чукӧрӧ, но бӧръя нэмъясӧ коми кывйын лои уна аслыспӧлӧслун, и сійӧ кутіс ёна торъявны пин, эст да венгер кывъясысь. Пин-йӧгра войтырлӧн му коркӧ паськӧдчылӧма Европа асыв-войвылын ӧнія Финляндиясянь Из (Урал) сайӧдз. Шӧр нэмӧ комияслӧн вӧлі асланыс анбур да асшӧр канму – Комму. Роч кадгижӧдъясын (летописьясын) сійӧс шуӧма Ыджыд Перымлӧн Ӧксымуӧн. Коми канмулысь да культуралысь асшӧр сӧвмӧмсӧ лои пасьвартӧма 1472 воын (кор роч армия босьтіс Ӧксымунымӧс), а 1505 воын дзикӧдз дугӧдӧма медбӧръя асвыналӧмсӧ.
Медым пуксьыны власьт бердӧ да кутны сійӧс, 1917 воын большевикъяслы быть ковмис личӧдыштны нартитӧм войтыръяслысь кӧртвомсӧ да сетны налы асшӧрлун. Пин, эст, латыш, литовеч войтыръяс Россияысь ӧдйӧ мынтӧдчисны сы вӧсна, мый важӧн нин вӧліны дасьӧсь.
Коми автономия котыртан кадӧ быд сё морт письыс 87-ыс
вӧлі коми. Лои позянлун лӧсьӧдны коми ыджыдалӧм. Йӧзӧс ве-лӧдӧм, небӧг лэдзӧм, ёрд (суд), удж арталан гижӧдъяс, пошта лоины комиӧсь. Кыптіс коми гижысьяслӧн, сьыланног лӧсьӧдысьяслӧн, Коми му туялысьяслӧн сямныс да збойлунныс. Рочму повзис войтыр ловзьӧм-сӧвмӧмысь да 1929 восянь мӧдіс дзескӧдны комияслысь асвыналӧм, а 1931 восянь Сӧвет власьт паніс сідз шусяна “СОФИН делӧ”, медым мыждыны асшӧр олӧм кыпӧдысь коми войтырӧс “буржуазнӧй националисталӧмысь”. Унаӧс лыйліс, сюйис дзескыдінъясӧ.
Мед кӧть и 1921 воын бӧр кыпӧдӧм коми кан водзӧ на олӧ, асьныс комияс важӧн нин оз ыджыдавны сэні. Комиӧс падмӧдӧ империя сяма колониальнӧй видзӧдласног да вужвойтырӧс кедзовтӧмлӧн водзӧ ёнмӧм, ГУЛАГ-лӧн колясъясыс да мӧд кывъя йӧзӧн кизьӧртӧм. Пӧръясьӧмӧн, ӧлӧдӧмӧн да повзьӧдлӧмӧн власьтыс ӧнӧдз на дзебӧ вужвойтырлысь инӧдъяс.
Бырӧдны став индӧм нелючкисӧ эм сӧмын ӧти туй – пӧртны олӧмӧ коми йӧзлысь асъюралӧм вылӧ инӧд.
Вужвойтыр да локтысь йӧз
1948-ӧд, 1966-ӧд воясын нин Россия кырымавліс ООН-ын вужвойтырлысь мырддьыны позьтӧм инӧдъяс йылысь колана гижӧд, кӧсйысис сетны миянлы асшӧрлун. На серти кӧ, Коми Подувпуктасын (Конституцияын) колӧ лоны татшӧм гижӧдлы: “Кӧзяиннас Коми республикаын лоӧны коми вужвойтыр (народ)”. Та пыдди сэтчӧ гижӧма: “Кӧзяиннас Комиын лоӧны сэні олысь 110 кывйӧн сёрнитысь йӧз.”* Вужвойтырыс (народыс) ӧткодь вир-яя, ӧти пӧлӧс лысьӧма, ӧтчукӧрын олысь, ӧти кывъя, ӧти оласнога йӧз. Коми республикаын олысь грузин оз вермы шуны асьсӧ вужолысьӧн – кӧзяинӧн. Сылӧн грузин войтырыс олӧны гортас – Грузияас, да сэні налӧн грузин власьт, кыв да культура. Сӧмын Грузияын грузинъяс лоӧны вужвойтырӧн (народӧн) – Грузияса Кӧзяинӧн. Комиын олӧны да локтӧны-мунӧны 109 пӧлӧс кывйӧн сёрнитысь йӧз. Найӧ лоӧны олысьясӧн (населениеӧн). Став локтӧм йӧзыслӧн эмӧсь Шыӧдчӧмӧн сетӧм да мырддьыны позьтӧм морт инӧдъяс, но налӧн оз вермы лоны Комиын асшӧрлун вылӧ да ыджыдалӧм вылӧ инӧд.
Грузияын кӧ ыджыдалӧ грузин, Украинаын – украинеч, Татарстанын – тотар, мыйла Комиын ыджыдалӧмсӧ сетӧма налы жӧ: 109 пӧлӧс кывйӧн сёрнитысь йӧзлы да Коми Кӧзяиныслы вичмӧдӧма 110-ӧд пайсӧ?!
Ӧнія Коми Подувпуктасӧн мырддьӧма коми вужвойтырлысь медыджыд инӧдсӧ – кӧзяиналӧмсӧ. Мӧд ногӧн кӧ – Коми республикаса медыджыд законӧ подувнас пуктӧма коми кесйӧгалӧм (рабалӧм). ООН-са гижӧдъяс тайӧс донъялӧны коми вужвойтырлысь мырддьыны позьтӧм инӧдъяссӧ торкалӧмӧн, да та понда Коми республика оз вермы шусьыны республикаӧн (государствоӧн), а лоӧ Рочмулӧн нартитана колонияӧн. Сӧмын ас инӧдъяс тӧдмалӧм-велӧдӧм, найӧс ас войтырлы гӧгӧрвоӧдӧм да олӧмӧ пӧртны кӧсйӧм мездас миянӧс кесйӧга олӧмысь.
*Статуправлениелӧн лыдпас.